கவிதை....

கவிதை.....
என்னுடனே நான் பேச ஆரம்பித்து
எல்லோருடனும் பேசி முடித்தேன்...

புத்தரும் பல்லிகளும்...

புத்தர் படத்துப் பின்புறப் பல்லி
பூச்சி தின்பதைப் போலே..

கேள்வியும் பதிலும்

ஏன்?
நான்.

கொடுக்கல் வாங்கல்

எதை வாங்க முடியாதோ
அதை விற்கவும் முடியாது.

பூஜ்யத்தின் அர்த்தங்கள்

சுத்தம்
நிசப்தம்
முழுச் சுதந்திரம்
காரணமில்லாத சுகம்
தான் என்று உணராத தனிமை
கடலின் நடு அமைதி
வெந்து தணிந்த சிதை
பாலைவனத்துப் பௌர்ணமி
எல்லோரும் ஊருக்குப் போய்விட்ட வீடு
அந்தரங்கமான சாவு
உடல்கள் கலந்ததின் முடிவு
முற்றிலும் நிறைந்த செல்வம்
அது முழுதும் கரைந்தபின் வரும்
இனியதொரு இல்லாமை .

சுகம்

மழைக் காலத்து ஜன்னல்
மல்லிகை
அழ்கியின் வெட்கம்
அருவிப் பனித் தூவல்
பறவைகளின் விடியல்
அந்தி நதி
தூரத்துக் கோவில் மனியோஅசை
இளம் வியர்வையின் மணம்
பச்சை வயல்களின் மத்தியில் போகும் புகைவண்டி
குழ்ந்தையின் கன்னக் குழி
மடி
மார்பு
ஆளிலாத மலைப் பாதை
நண்பனின் சிரிப்பு
மிரட்டக் கிடைத்த பலவீனன்
சாகசக் கதை
சரித்திரச் சின்னம்
மர்மம்
கட்டுப் பணங்கள்
மரத்திலேயே பழுத்திருக்கும் மாங்கனி
நாக்கில் ருசி மீட்டும் உணவு
நறுமணம்
வெற்றுடல்
விளையாட்டு
மற்றவர் வேதனை
அந்தரங்கமான கவிதை
கடித்துக் குதறும் கோஅபம்
குளித்து முடித்து வரும் அமைதி
சாவு

மனம்

மன நோய் என்கிறார்கள்

மனமே நோய் என்றார்களா?

ஒரு குழ்ந்தையின் குற்றப் பத்திரிக்கை

அவன் செய்த குற்றம்
அப்பனானது.
தனது தோல்விகளை எல்லாம் தினமும்
எனது தோள்களுக்கு மாற்றி இலைப்பாரும் சுயநலமி.
அவனது நிறைவேறாத கனவுகளால்
நித்தமும எனது விளையாட்டுப் பொம்மைகளை உடைத்தெறியும் வன்முறையாளன்.
அவனது ஆண்மைக்கு நான் சாட்சி.
அன்பு என்னும் அவனது வேஷத்துக்காக எழுதப் பட்ட காட்சி.
என்னை முதன்முதலாகக் கொன்றவன்.
சோறு போட்டு அதில் என்
சுதந்திரத்துக்கு விஷம் வைத்தவன்.
அவனது முரட்டுக் கரங்களின் கிறுக்கல் நான் .
இவர்கள் கும்பிடும் சாமிகளால் என்னைச் சிறை வைத்திருக்கிறார்கள்.
பள்ளிக்கூடச் சமாதிகளில் புத்தகங்களின் சிதை அடுக்கி
என்னை ஆசிரியர்கள் கொளுத்துகிறார்கள்.
நான் ஒரு குழ்ந்தை அல்ல-இப்படி சாகடிக்கப் பட்ட
ஆயிரமாயிரம் குழ்ந்தைகளின் ஆவி.

வாழ்க்கை

வாழ்க்கையே,
அன்பு ,வன்முறை ,கற்பு, கயமை,உண்மை. பொய்மை,
த்ர்மம் ,அதர்மம் ,நட்பு, பகை,விதி, மதி
என்று எல்லாவற்றுக்கும் தலை ஆட்டுகிறாயே
உனக்கு யார்தான் எஜமானன்?

குழலின் ராகங்கள்

எல்லா ராகங்களுக்கும் பின்னால்

குழலின் உட்புறத்து எச்சில் இருக்கிறது.

'படித்துறை'

கரையிலிருக்கும் கடவுளைப் பற்றிக் கவலைப்படாமல்
அந்தக் கோவிலின் புனிதநதி எந்நேரமும் ஓடிக் கொண்டே இருக்கிறது....
நம் வாழ்க்கையைப் போலவே.....